Gunnar Bjarki í 16 liða úrslit á EM U17

Gunnar Bjarki Björnsson úr TBR er kominn í 16 liða úrslit í einliðaleik á Evrópumeistaramóti U17 sem fram fer í Slóveníu. Gunnar Bjarki sat yfir í fyrstu umferð mótsins og sigraði síðan Filip Stojliljkovic frá Serbíu í annari umferð.

Í þriðju umferð átti Gunnar Bjarki svo að spila gegn Lucas Corvee frá Frakklandi sem fyrir mótið var talinn 3 - 4 sterkasti leikmaður mótsins. Eitthvað hefur þó komið upp á í leik Corvees í gær þar sem hann þurfti að gefa leikinn gegn Gunnari Bjarka.

Gunnar Bjarki leikur gegn Daniel van Hooijdonk frá Wales í næstu umferð en Daniel þessi er fyrirfram talinn einn af 16 bestu leikmönnum mótsins.

Það sem vekur athygli á árangri Gunnars Bjarka er það að þetta er Evrópumót fyrir leikmenn 17 ára og yngri en Gunnar Bjarki er einungis 15 ára gamall og má því taka þátt í þessu móti aftur þegar það verður haldið eftir 2 ár. Það verður því spennandi að fylgjast með árangri Gunnars Bjarka bæði síðar í dag og þegar fram líða stundir.

Leikurinn hefst kl 16:40 að staðartíma sem er kl 15:40 að íslenskum tíma. Hægt er að fylgjast með leiknum á "live score" með því að smella hér og velja "view live score" uppi í hægra horninu.

Hægt er að sjá öll úrslit úr einstaklingskeppninni með því að smella hér

Hægt er að sjá öll úrslit úr liðakeppninni sem fram fór fyrir einstaklingskeppnina með því að smella hér.