Helgi Jóhannesson og Ragna Ingólfsdóttir taka þátt í alþjóðlegu móti sem fram fer á Kýpur þessa dagana. Þau léku í einliðaleik í gær föstudag, auk þess að keppa saman í tvenndarleik.
Þau leika í dag saman í tvenndarleiknum í 8-liða úrslitum gegn Joe Morgan og Kerry-Ann Sheppard frá Wales. Þau Joe og Kerry-Ann voru fyrir mótið talin vera þriðja sterkasta parið í mótinu svo það er erfið viðureign framundan fyrir íslenska liðið. Leikurinn hefst kl 10:00 að staðartíma en það er kl 7:00 á íslenskum tíma. Hægt er að fylgjast með leiknum og öðrum leikjum mótsins með því að smella hér og velja svo "view live score" uppi í hægra horninu.
Helgi lék í einliðaleik í gær og sigraði fyrsta andstæðing sinn, Giovanni Greco frá Ítalíu, 16-21 21-13 21-19 í hörkuleik. Helgi byrjaði illa og komst aldrei í gírinn í fyrstu lotunni. Hann snéri svo við blaðinu og annarri lotunni og var kominn í 17-11 í þriðju lotunni þegar Ítalinn byrjaði að saxa á forskotið og komst í 19-19 en þá náði Helgi aftur tökum á leiknum og kláraði 21-19.
Í annarri umferð lenti Helgi á móti Simon Manuory frá Frakkalandi. Simon þessi er talinn sterkasti maður mótsins fyrirfram og er númer 95 á heimslista alþjóðabadmintonsambandsins. Helgi tapaði leiknum eftir ágætis baráttu 21-12 21-12.
Ragna keppti einnig í einliðaleik í gær og spilaði gegn Carolina Marin frá Spáni. Marin sem er ung og efnileg komst ma í úrslit á Evrópumeistaramóti unglinga á síðasta ári. Ragna átti í erfiðleikum gegn Marin og komst aldrei almennilega inn í leikinn. Hún sagðist hafa átt í erfitt með að koma boltanum í spil og komst þar af leiðandi sjaldan í sóknarstöðu. Leikurinn endaði 21-13 21-13 fyrir þá spænsku.
Til að sjá önnur úrslit úr leikjum gærdagsins er hægt að smella hér
