Sveppi og Auddi í heimsókn.

Grínistarnir Sveppi og Auddi komu í heimsókn í TBR til að taka upp efni fyrir þátt sinn sem er í sýningu á Stöð 2 á föstudagskvöldum. Þátturinn verður tileinkaður Reykjavík International Games eða RIG eins og það er oftast kallað. Þeir félagar flakka milli íþróttagreina sem keppt er í á RIG og keppa við reynda einstaklinga í hverri íþrótt.

TBR-ingurinn sem varð fyrir valinu til að keppa gegn Sveppa var Daníel Stefánsson, verslunarstjóri TBR. Daníel sem er 75 ára gamall, og hefur spilað badminton í yfir 40 ár, spilaði leik við Sveppa við mikinn fögnuð ungra badmintonspilara sem voru á æfingu á sama tíma.

Sveppi var fullur sjálfstrausts þegar hann mætti í TBR og ekki vantaði yfirlýsingarnar. ,,Ég tapa ekki fyrir gamalmenni" voru hans orð. Auddi hins vegar sagði krökkunum að hann vonaðist til að Sveppi myndi tapa svo að hægt væri að stríða Sveppa.

Sveppi og Daníel voru mestu mátar eftir leikinn

Úrslit leiksins verða svo kunngjörð í þætti þeirra Audda og Sveppa föstudagskvöldið 15. janúar nk.