TBR með sterka liðsheild á Íslandsmóti unglinga 2026

Íslandsmót unglinga 2026 í badminton fór fram dagana 10.–12. apríl í TBR húsinu í Reykjavík, þar sem Badmintonsamband Íslands og Tennis- og Badmintonfélag Reykjavíkur stóðu sameiginlega að skipulagningu og framkvæmd mótsins.

Keppendur TBR létu svo sannarlega að sér kveða, en félagið sendi 55 glæsilega spilara til leiks í öllum aldursflokkum. Það var virkilega ánægjulegt að fylgjast með þessum öfluga hópi, þar sem leikgleði, barátta og samheldni einkenndu frammistöðu allra, jafnt þeirra sem stigu sín fyrstu skref á stóra sviðinu sem og þeirra sem hafa meiri reynslu.

Stemningin í húsinu var frábær alla helgina og mikil gleði ríkti bæði innan vallar sem utan. Leikirnir voru spennandi og sýndu vel þann mikla vöxt og þróun sem á sér stað í yngri flokkum badmintonhreyfingarinnar.

Þó áherslan sé fyrst og fremst á heildina og uppbyggingu framtíðarinnar, má ekki líta framhjá því að árangurinn var einnig eftirtektarverður. TBR-ingar unnu alls 25 af 32 bikurum mótsins. Þá náðu þrír leikmenn einstaklega glæsilegum árangri með því að vinna þrefaldan titil hver: Iðunn Jakobsdóttir, Eggert Þór Eggertsson og Óðinn Magnússon.

Slíkur árangur verður þó ekki til nema með öflugu umhverfi. TBR er afar stolt af öllum sínum keppendum og þeirri menningu sem hefur verið byggð upp innan félagsins, þar sem áhersla er lögð á bæði árangur og vellíðan iðkenda. Það var sérstaklega ánægjulegt að sjá hversu vel eldri keppnishópurinn lagði sitt af mörkum við framkvæmd mótsins og skapaði góðar aðstæður fyrir yngri iðkendur. Einnig má hrósa foreldrum og gestum mótsins fyrir góða hvatningu og stuðning alla helgina.

Félagið vill færa Badmintonsambandi Íslands sérstakar þakkir fyrir gott samstarf, öðrum félögum fyrir skemmtilega og heiðarlega keppni, sem og þjálfurum TBR fyrir þeirra mikilvæga starf við að undirbúa og styðja við keppendur.

Það er bjart framundan í íslensku badmintonlífi og verður spennandi að fylgjast með þessum öfluga hópi vaxa og dafna á komandi árum.