Arna Karen Jóhannsdóttir nýr íþróttastjóri TBR

Arna Karen Jóhannsdóttir, nýr íþróttastjóri TBR

TBR tilkynnir með ánægju að Arna Karen Jóhannsdóttir tekur við starfi íþróttastjóra félagsins í sumar. Hún tekur við af Jóhanni Kjartanssyni, sem lætur af störfum eftir yfir fjóra áratugi af ómetanlegu framlagi til badmintonhreyfingarinnar á Íslandi.

Arna Karen hefur verið virkur hluti af TBR frá árslokum 2011 og þekkt andlit innan félagsins í gegnum árin. Hún er einn fremsti badmintonleikmaður landsins og núverandi Íslandsmeistari í tvenndarleik í Úrvalsdeild. Hún á auk þess þrjá Íslandsmeistaratitla til viðbótar – einn í tvenndarleik og tvo í tvíliðaleik – og var útnefnd badmintonkona ársins 2023. Arna hefur verið fastamaður í A-landsliði Íslands frá árinu 2018 og gegnt þar lykilhlutverki.

Eftir sjö ára dvöl í Danmörku snýr Arna nú aftur heim með dýrmæta reynslu og menntun að baki. Hún lauk námi í íþróttafræði við háskólann í Árósum, spilaði með dönsku félögunum Ikast FS og Viby J. Arna var lykilmanneskja í að tryggja tryggja áframhaldandi veru Viby J í næst efstu deild Danmerkur. Samhliða keppnisferlinum starfaði hún sem kennari við Rønde Efterskole og badmintonþjálfari hjá Viby J.

Við hjá TBR hlökkum til samstarfsins með Örnu og bjóðum hana innilega velkomna til starfa sem íþróttastjóri félagsins. Um leið viljum við færa Jóhanni Kjartanssyni okkar dýpstu þakkir fyrir ómetanlegt og óeigingjarnt starf í þágu félagsins og badmintoníþróttarinnar á Íslandi. Án hans hefði saga TBR og íslensks badminton verið allt önnur.